22-06-2025
Hopes ahead of ECOWAS 67th meeting, end of Tinubu tenure as Chairman
President Bola Ahmed Tinubu go host di 67th ordinary session of di Economic Community of West African States in Abuja.
Delegates from member states Ecowas begin land for di Banquet hall of di state house, for di meeting on Sunday.
Dis meeting dey happun six months afta di one wey happun for December 2024 and e go also mark di end of Tinubu two-year tenure as Chairman of ECOWAS.
Na during di last meeting di bodi bin approve di exit of Mali, Burkina Faso, and Niger from di regional bloc.
Nigeria ministry of Foreign Affairs bin announce say di summit aim na to deepen regional economic integration, address security challenges, and advance economic cooperation across ECOWAS member states.
Dis 67th Ecowas summit go bring togeda West African leaders to discuss pressing issues, including democratic governance, regional stability, and ongoing efforts to reintegrate Sahelian states wey bin commot di bloc.
Meanwhile, di West Africa Economic Summit (WAES), wey President Tinubu bin hold bifor di 67th ECOWAS summit focus on how to boost trade and investment cooperation across West Africa.
Di programme see attendance from different West African leaders, including di Presidents of Ghana, Liberia, Sierra Leone, Senegal, The Gambia, Benin, Togo, and Guinea-Bissau.
WAES dey aim to get ogbonge outcomes and deliverables wey go help fast-track West Africa integration agenda, wey dey key for regional peace, security, and prosperity.
President Tinubu bin dey re-elected on 7 July, 2024, for a second term aft aim first tenure wey wey bin strat for 9 July, 2023.
Military takeovers in West Africa and ECOWAS main challenge
"Di recent wave of instability and military takeovers in our region no be just security concern—na economic emergency. We must defend democracy as a prerequisite for prosperity", dat na statement from Ghana president John Mahama during di West Africa Economic Summit for Abuja.
Di president wey tok through Ghana finance minister during di WAES on Saturday, say economic integration and trade no fit thrive for atmosphere wey political instability dey.
Mahama describe di recent wave of military coups in West Africa as no be just a threat to democracy but "economic emergency" wey undermine di region growth prospects.
"Trade no fit flourish wia democracy dey retreat. Investment no dey land wia governance dey broken.
"Let West African leaders recommit to constitutional order—no be as abstract ideal, but as a practical requirement for growth. We no fit unlock trade while our region dey locked in conflict," di president tok.
