Ghana face host Morocco for chance to reach Wafcon 2024 final

BBC News

5 days ago

Host of di 2024 Wafcon Morocco go jam Ghana for one of two semifinal games for di competition.
Di Atlas lionesses dey on track to reach dia second successive final afta dem sama Mali 3-1 for di quarterfinal game.
Di Black Queens of Ghana dey return to dis stage of di Wafcon for di first time since 2016, afta dem beat Algeria on penalties for dia own quarterfinal game.
Morocco get one of di best attacks for di tournament; dem score 10 goals in four games compared to di five goals Ghana bin score.
Dem bin top dia group A wit two wins and one draw.
For dia 3-1 game against Mali, dem bin dey solid di whole game wit two goals from Ibtissam Jraïdi and one from Kenza Chapelle for di Olympic stadium.
Dia captain Ghizlane Chebbak na current top scorer with four goals.
Ghana keeper Cynthia Konlana na di start for di black queens for dia quarterfinal as she bin make two saves during di penalty shootout wey Ghana finally win 4-2.
Di Black Queens bin comot group C wia get South Africa, Mali and Tanzania. Dem bin concede four goals wia dem finish wit four points to qualify afta South Africa.
Since di South Africa group opening game, di Black Queens bin dey pick up momentum small-small.
But as di tournament bin dey reach di business zone, tins don dey change.
Na who get beta tactics for di match day bin dey win games.
Wetin dia coaches tok
Coach for di Atlas Lionesses Jorge Vilda tok say "di public gatz to come to di stadium to help us from di first moment."
Im add say "wetin we get inside our head, na to reach di final."
Afta dia Mali game, di coach tok say "dis team sabi how to endure and strike when di time dey right."
Jorge Villa explain for di pre-match press conference say "di players dey motivated for dis game to beat Ghana."
"Dem already bin face strong physical team for dis tournament na so we go give everitin to reach di final."
For di Ghana coach Kim Lars Björkegren, even though di crowd go dey in favour of di host kontri, im tink say dat also fit be advantage.
Di Ghana coach bin dey put togeda strategy wey fit to expose di weaknesses of di hosts.
"I bin student everitin. I don watch di patterns and everitin; I bin like to be in control."
Oga Lars add say "dis game means a lot to di kontri. We dey here to represent Ghana; we sabi say e go dey tough but we dey ready. We go give am our everitin."
Key players and wetin dem tok
For Morocco, striker Ibtissam Jraidi wey dem name am player of di 3-1 match against Mali, di game go dey tough.
"We sabi say dis one go hard well well, but we dey aware of di responsibility we dey carry."
She tok say "individual awards no dey matter so much - wetin dey need na to help di team win and to reach di final."
Captain Ghizlane Chebbak na ogbonge player for Morocco wia fit dey important for dis game.
She already bin score four goals so far for di competition.
Na she bin lead di team to di 2022 Wafcon final and di round of 16 for Di 2023 women's World Cup
For di 2022 Wafcon, na she be di player of di tournament and top scorer.
Ghana gatz to keep dia eyes on her if dem go get chance to reach di final.
For Ghana, goalkeeper Cynthia Konlan go dey important inside di goal to stop di Morocco attacks.
But apart from her, revelation of di tournament for Ghana midfielder Chantelle Boye-Hlorkah go play ogbonge part if di team go reach di final
She bin win player of di match for di game against Tanzania when she bin score one wey she also assist one goal.
Her passes and crosses into di box go dey dangerous for Ghana and fit to create chances for di attackers like Doris Boaduwaa.
Jennifer Cudjoe for midfield go hold tins tight as captain Portia Boakye go remain di rock for di defence.
Di 36 year old experienced defender so far na key player for di black queens; dem go need her leadership for dis game.
Princess Marfo and Stella Nyamekeye go also dey important for di attack so dem fit cause trouble for di Morocco backline.
Head-to-head
Di black queens and Atlas Lionesses bin play each oda five times.
All dis games na friendly matches
Na so Morocco bin lead with 3 wins, wey Ghana get 2 wins
Di last time dem bin play na for one friendly in February 2025 wia Morocco win 1-0.
Nigeria and South Africa go play di first semifinal game bifor Ghana go take on Morocco.
Di game go happun at 7PM GMT (8PM WAT).
We go bring una live commentary for dis ogbonge game wey go determine who go play for di Wafcon 2024 final.
Make una join us from 6:45 PM for di build up