18-07-2025
Public facilities wey don get new name since 2023
Within two years wey di Nigeria president office, President Bola Tinubu start im administration e don commission and rename several goment properties afta im name, politicians and popular figures for Nigeria.
On Thursday, president Bola Tinubu rename di University of Maiduguri (UNIMAID) afta di late former President Muhammadu Buhari.
Buhari die at di age of 82 for one London clinic on Sunday and im family bury am on Tuesday for Daura, Katsina state.
During di Federal Executive Council (FEC) wey hold in honour of di late former president on Thursday, Tinubu rename UNIMAID to Muhammadu Buhari University, Maiduguri.
"Di ceremony for di special session of di Federal Executive Council honour di eighth Nigerian leader— civil war hero, former military head of state, and anti-corruption advocate — passing on July 13, with legacy of discipline and patriotism," di statement tok.
"President Tinubu, open di floodgates of tributes in di presence of later leader children, e rename di 50-year-old University of Maiduguri Muhammadu Buhari University."
UNIMAID to Muhammadu Buhari University
Dem establish di university in 1975, under military goment in di capital city of Borno State, in northeast Nigeria. UNIMAID get 16 faculties and 127 programmes, wit 26 000 students.
Now, di president don rename am as Muhammadu Buhari University, Maiduguri.
Buhari serve as Nigeria democratically elected president from 2015 to 2023, e also rule as military head of state from January 1984 to August 1985.
Abuja International Conference Centre to Bola Ahmed Tinubu International Centre
Recently, dem rename Abuja International Conference Centre wey former President Ibrahim Babangida Tinubu to Bola Ahmed Tinubu International Centre.
Di Nigeria Minister of Federal Capital Territory, Nyesom Wike also name halls inside di centre afta some politicians.
Im name halls afta Vice President Kashim Shettima, Chief Justice of Nigeria Kudirat Kekere-Ekun, Senate President Godswill Akpabio and Speaker of di House of Representatives Tajudeen Abbas.
According to di FCT Minister, dis na im way to say thank you to dem for supporting im FCT Administration and for how di Judiciary and Legislative arms of goment dey collabo wit executive.
Former President Ibrahim Badamosi Babangida bin build di Abuja International Conference Centre for 1991.
According to Wike, Babangida bin build to ICC to host one Organization of African Unity meeting.
Oda tins goments don rename since 2023
In March 2024, Niger State govnor, Mohammed Umaru Bago, rename di Minna International Airport from Abubakar Imam Kagara International Airport to Bola Ahmed Tinubu International Airport.
Many residents of di state para ova di new changes accusing di govnor of operating Tinubu-led goment for dia state.
In June 2025, president Bola Tinubu also name one 300-bed specialist hospital for Millennium Square in Kaduna state as Bola Ahmed Tinubu Specialist Hospital.
In January 2025, president Bola Tinubu commission newly built military barracks in Abuja and name di facility afta imsef "Bola Ahmed Tinubu Barracks."
Di barrack go accommodate military personnel and provide dem facilities like sport center, clinic, worship centers, roads, among others.
During di commission, president Tinubu describe di officers of di Nigerian Armed Forces as "heroes" of Nigeria.
In December 2024, dem rename di Immigration Headquarters afta Bola Ahmed Tinubu Technology Innovation Complex.
Di president also name, di Murtala Mohammed Expressway for Abuja afta Nobel Laureate, Wole Soyinka in June 2024.
